maut aae to is tarah aae

maut aa.e to is tarah aa.e

zindagī ko ḳhabar na ho paa.e

ham na badleñge rāsta apnā

jaan jaatī hai gar chalī jaa.e

maut bar-haq hai aa.egī lekin

chārāgar kaun tujh ko samjhā.e

sar salāmat jahāñ nahīñ rahte

sar uThā kar vahāñ se ham aa.e

dar pe chhoḌ aa.e un ke ruuh apnī

sirf ham jism ko uThā laa.e

jab rahā hī nahīñ koī apnā

kaun ġhamgīn dil ko bahlā.e

apne hī dil pe ab nahīñ qaabū

ḳhush kabhī ho kabhī ye uktā.e

apnī likkhī huī ġhazal paḌhnā

dil jo 'hānī' tumhārā ghabrā.e

maut aae to is tarah aae

zindagi ko KHabar na ho pae

hum na badlenge rasta apna

jaan jati hai gar chali jae

maut bar-haq hai aaegi lekin

chaaragar kaun tujh ko samjhae

sar salamat jahan nahin rahte

sar uTha kar wahan se hum aae

dar pe chhoD aae un ke ruh apni

sirf hum jism ko uTha lae

jab raha hi nahin koi apna

kaun ghamgin dil ko bahlae

apne hi dil pe ab nahin qabu

KHush kabhi ho kabhi ye uktae

apni likkhi hui ghazal paDhna

dil jo 'hani' tumhaara ghabrae