maut aaegi jo ruswai ka saman hoga

maut aa.egī jo rusvā.ī kā sāmāñ hogā

chaak dil hogā agar chaak garebāñ hogā

dil ko bahlātā huuñ ye kah ke tirī furqat meñ

parda-e-ġhaib se ḳhud vasl kā sāmāñ hogā

hashr meñ dekheñge rahmat kā tamāshā zāhid

jab ḳhatāvār ḳhatāoñ pe pashemāñ hogā

malak-ul-maut ko bhī saath gul apne laanā

mujh pe ehsān terā ai shab-e-hijrāñ hogā

rahnumā.ī rah-e-ulfat meñ jo ai ḳhizr kare

vo farishta to nahīñ mujh sā hī insāñ hogā

ham na kahte the ki hai hosh-rubā husn tirā

aa.ina dekh na tū dekh ke hairāñ hogā

mujh se kahtī hai shab-e-vasl pareshāñ-nazarī

aap ke dil meñ bhī shāyad koī armāñ hogā

kū-e-jānāñ kī havas tujh ko bahut hai ai 'shād'

ḳhaak ke zarroñ kī mānind pareshāñ hogā

maut aaegi jo ruswai ka saman hoga

chaak dil hoga agar chaak gareban hoga

dil ko bahlata hun ye kah ke teri furqat mein

parda-e-ghaib se KHud wasl ka saman hoga

hashr mein dekhenge rahmat ka tamasha zahid

jab KHatawar KHataon pe pasheman hoga

malak-ul-maut ko bhi sath gul apne lana

mujh pe ehsan tera ai shab-e-hijran hoga

rahnumai rah-e-ulfat mein jo ai KHizr kare

wo farishta to nahin mujh sa hi insan hoga

hum na kahte the ki hai hosh-ruba husn tera

aaina dekh na tu dekh ke hairan hoga

mujh se kahti hai shab-e-wasl pareshan-nazari

aap ke dil mein bhi shayad koi arman hoga

ku-e-jaanan ki hawas tujh ko bahut hai ai 'shad'

KHak ke zarron ki manind pareshan hoga