maut aati hai na kambaKHt qarar aata hai

maut aatī hai na kambaḳht qarār aatā hai

tujh pe ab rahm bahut ai dil-e-zār aatā hai

kuchh na.e hote haiñ āġhāz-e-mohabbat ke maze

kuchh ajab shaan se dil meñ ġham-e-yār aatā hai

lutf se chheḌte ho bazm-e-adū meñ mujh ko

inhīñ bātoñ se to bas dil meñ ġhubār aatā hai

tāzgī lutf-e-mohabbat meñ huī phir kuchh kuchh

aaj phir lab pe mire shikva-e-yār aatā hai

pahle thī dil meñ harārat bhī bahut kuchh ab to

naam se ishq-o-mohabbat ke buḳhār aatā hai

karvaTeñ lene se kuchh haal badaltā hai kahīñ

lauTne se koī furqat meñ qarār aatā hai

ġhair to ġhair hai tum bhī nahīñ vāqif un se

jin adāoñ pe tumhārī mujhe pyaar aatā hai

maut aati hai na kambaKHt qarar aata hai

tujh pe ab rahm bahut ai dil-e-zar aata hai

kuchh nae hote hain aaghaz-e-mohabbat ke maze

kuchh ajab shan se dil mein gham-e-yar aata hai

lutf se chheDte ho bazm-e-adu mein mujh ko

inhin baaton se to bas dil mein ghubar aata hai

tazgi lutf-e-mohabbat mein hui phir kuchh kuchh

aaj phir lab pe mere shikwa-e-yar aata hai

pahle thi dil mein hararat bhi bahut kuchh ab to

nam se ishq-o-mohabbat ke buKHar aata hai

karwaTen lene se kuchh haal badalta hai kahin

lauTne se koi furqat mein qarar aata hai

ghair to ghair hai tum bhi nahin waqif un se

jin adaon pe tumhaari mujhe pyar aata hai