maut bhi samne aa jae to uD sakta hun

maut bhī sāmne aa jaa.e to uḌ saktā huuñ

itnā achchhā huuñ ki ab sirf bigaḌ saktā huuñ

maiñ vo bastī huuñ jo bastī hai ujaḌne ke liye

mujh ko aadat hai ujaḌne kī ujaḌ saktā huuñ

tum se pahle bhī ka.ī chhoḌ chuke hai mujh ko

tum se pahle bhī maiñ bichhḌā huuñ bichhaḌ saktā huuñ

kaun kartā hai yahāñ jang natīje ke liye

jiit kar hārne vaale se jhagaḌ saktā huuñ

dauḌ meñ jitne bhī laḌke haiñ vo juute meñ haiñ

maiñ binā paañv huuñ mumkin hai pichhaḌ saktā huuñ

maiñ tumheñ chāñd sitāre to nahī de saktā

tang lamhoñ meñ magar haath pakaḌ saktā huuñ

maut bhi samne aa jae to uD sakta hun

itna achchha hun ki ab sirf bigaD sakta hun

main wo basti hun jo basti hai ujaDne ke liye

mujh ko aadat hai ujaDne ki ujaD sakta hun

tum se pahle bhi kai chhoD chuke hai mujh ko

tum se pahle bhi main bichhDa hun bichhaD sakta hun

kaun karta hai yahan jang natije ke liye

jit kar haarne wale se jhagaD sakta hun

dauD mein jitne bhi laDke hain wo jute mein hain

main bina panw hun mumkin hai pichhaD sakta hun

main tumhein chand sitare to nahi de sakta

tang lamhon mein magar hath pakaD sakta hun