maut hai zindagi zindagi maut hai

maut hai zindagī zindagī maut hai

har-nafas maut hai har ghaḌī maut hai

maiñ añdheroñ meñ kho jā.ūñ mumkin nahīñ

ek parvāne kī raushnī maut hai

is liye shaad rahtā huuñ har haal meñ

mere dushman ko merī ḳhushī maut hai

koī talvār ḳhanjar na tīr-o-tabar

hurmula ke liye ik hañsī maut hai

ḳhāmushī āqiloñ kī hai ḳhūbī magar

ba.az auqāt par ḳhāmushī maut hai

sābiroñ ke liye har taraf hai hayāt

zālimoñ ke liye maut hī maut hai

ek kaḌvī haqīqat kaheñ aur kaheñ

shahd se bhī sivā chāshnī maut hai

qaid-e-ġhurbat se 'ārif' nikal jā.iye

hai ḳhabar aap ko muflisī maut hai

maut hai zindagi zindagi maut hai

har-nafas maut hai har ghaDi maut hai

main andheron mein kho jaun mumkin nahin

ek parwane ki raushni maut hai

is liye shad rahta hun har haal mein

mere dushman ko meri KHushi maut hai

koi talwar KHanjar na tir-o-tabar

hurmula ke liye ek hansi maut hai

KHamushi aaqilon ki hai KHubi magar

baz auqat par KHamushi maut hai

sabiron ke liye har taraf hai hayat

zalimon ke liye maut hi maut hai

ek kaDwi haqiqat kahen aur kahen

shahd se bhi siwa chashni maut hai

qaid-e-ghurbat se 'arif' nikal jaiye

hai KHabar aap ko muflisi maut hai