maut ko thamenge sadme mein nahin aaenge

maut ko thāmeñge sadme meñ nahīñ ā.eñge

zindagī ham tere hisse meñ nahīñ ā.eñge

ham ko taftīsh kā haq hai vo kareñge puurī

ab ke ham aap ke jhāñse meñ nahīñ ā.eñge

ham bikharte hue motī haiñ hameñ mat chuniye

ham kabhī vaqt ke dhāge meñ nahīñ ā.eñge

ham ko kyā aap ko da.avā hai ḳhudā.ī kā agar

ham kabhī aap ke kahne meñ nahīñ ā.eñge

ham baḌe shahr ke baasī bhī haiñ maġhrūr bhī haiñ

ham kabhī aap ke qasbe meñ nahīñ ā.eñge

ashk ban ke tirī palkoñ pe sajeñge lekin

aks ban ke tire chashme meñ nahīñ ā.eñge

ham guzāre hue lamhoñ meñ Thahar jā.eñge

ham guzarte hue lamhe meñ nahīñ ā.eñge

raat ko lūTte phirte haiñ jo logoñ kā sukūñ

vo kabhī din ke ujāle meñ nahīñ ā.eñge

ham sā tum koī banā paao ye mumkin hī nahīñ

ham kisī baḳht ke sāñche meñ nahīñ ā.eñge

ham ki vo ḳhasta makān haiñ jo girā chāhte haiñ

ham tire shahr ke naqshe meñ nahīñ ā.eñge

ye jo aflāk ke aañsū haiñ dikhāve ke haiñ bas

ham to bārish ke barasne meñ nahīñ ā.eñge

zindagī tū ne vafā kī na nibhā.ī jin se

vo kabhī tere bharose meñ nahīñ ā.eñge

maut ko thamenge sadme mein nahin aaenge

zindagi hum tere hisse mein nahin aaenge

hum ko taftish ka haq hai wo karenge puri

ab ke hum aap ke jhanse mein nahin aaenge

hum bikharte hue moti hain hamein mat chuniye

hum kabhi waqt ke dhage mein nahin aaenge

hum ko kya aap ko dawa hai KHudai ka agar

hum kabhi aap ke kahne mein nahin aaenge

hum baDe shahr ke basi bhi hain maghrur bhi hain

hum kabhi aap ke qasbe mein nahin aaenge

ashk ban ke teri palkon pe sajenge lekin

aks ban ke tere chashme mein nahin aaenge

hum guzare hue lamhon mein Thahar jaenge

hum guzarte hue lamhe mein nahin aaenge

raat ko luTte phirte hain jo logon ka sukun

wo kabhi din ke ujale mein nahin aaenge

hum sa tum koi bana pao ye mumkin hi nahin

hum kisi baKHt ke sanche mein nahin aaenge

hum ki wo KHasta makan hain jo gira chahte hain

hum tere shahr ke naqshe mein nahin aaenge

ye jo aflak ke aansu hain dikhawe ke hain bas

hum to barish ke barasne mein nahin aaenge

zindagi tu ne wafa ki na nibhai jin se

wo kabhi tere bharose mein nahin aaenge