maut kya KHatm-e-hayat-e-gham-e-duniya karna

maut kyā ḳhatm-e-hayāt-e-ġham-e-duniyā karnā

hāsil-e-zīst hai marne kī tamannā karnā

qissa-e-tūr kā hai mujh ko i.aada karnā

ek baar aur karam barq-e-tajallā karnā

jab ki aatā hai nazar terā hī jalva har sū

phir to be-kār nigāhoñ se hai parda karnā

aabrū khoī sar-e-bazm girā kar aañsū

chashm-e-ḳhūñ-bār ko lāzim na thā rusvā karnā

siikh le ham se jabīñ-sā.ī-e-ka.aba zāhid

ham ko aatā hai dar-e-yār pe sajda karnā

thī kabhī dil meñ tamannāoñ kī duniyā lekin

ab to aatā hī nahīñ dil ko tamannā karnā

kheltā jin ke safīna se hai tūfāñ un ko

nāravā hai havas-e-sāhil-e-dariyā karnā

ik nazar dekh lo pahle mirī hālat aa kar

phir samajhne ko paḌī umr hai samjhā karnā

tum pa.e-mashq-e-sitam teġh uThāo to sahī

shauq se phir sar-e-'afqar' kā nazāra karnā

maut kya KHatm-e-hayat-e-gham-e-duniya karna

hasil-e-zist hai marne ki tamanna karna

qissa-e-tur ka hai mujh ko iada karna

ek bar aur karam barq-e-tajalla karna

jab ki aata hai nazar tera hi jalwa har su

phir to be-kar nigahon se hai parda karna

aabru khoi sar-e-bazm gira kar aansu

chashm-e-KHun-bar ko lazim na tha ruswa karna

sikh le hum se jabin-sai-e-kaba zahid

hum ko aata hai dar-e-yar pe sajda karna

thi kabhi dil mein tamannaon ki duniya lekin

ab to aata hi nahin dil ko tamanna karna

khelta jin ke safina se hai tufan un ko

narawa hai hawas-e-sahil-e-dariya karna

ek nazar dekh lo pahle meri haalat aa kar

phir samajhne ko paDi umr hai samjha karna

tum pae-mashq-e-sitam tegh uThao to sahi

shauq se phir sar-e-'afqar' ka nazara karna