maut se dard-e-mohabbat ki dawa mangi hai

maut se dard-e-mohabbat kī davā māñgī hai

maiñ ne ḳhud apnī ḳhatāoñ kī sazā māñgī hai

toḌ mat bahr-e-ḳhudā aas Dil-e-pur-ġham kī

maiñ ne zālim tire milne kī duā māñgī hai

rahmateñ us kī tabāhī-e-vafā par jis ne

marte-marte tire dāman kī havā māñgī hai

maiñ ne kuchh aur nahīñ chāhā ḳhudā-e-ġham se

bas tire husn kī har ek balā māñgī hai

apne sar aap na leñ dil-shikanī kā ilzām

maiñ ne ḳhud apnī tabāhī kī duā māñgī hai

haa.e kyā chiiz hai 'sāhir' ye mirā husn-e-talab

maiñ ne har chiiz zamāne se judā māñgī hai

maut se dard-e-mohabbat ki dawa mangi hai

main ne KHud apni KHataon ki saza mangi hai

toD mat bahr-e-KHuda aas Dil-e-pur-gham ki

main ne zalim tere milne ki dua mangi hai

rahmaten us ki tabahi-e-wafa par jis ne

marte-marte tere daman ki hawa mangi hai

main ne kuchh aur nahin chaha KHuda-e-gham se

bas tere husn ki har ek bala mangi hai

apne sar aap na len dil-shikani ka ilzam

main ne KHud apni tabahi ki dua mangi hai

hae kya chiz hai 'sahir' ye mera husn-e-talab

main ne har chiz zamane se juda mangi hai