موت سے جنگ کر رہا ہے کیا

موت سے جنگ کر رہا ہے کیا

اب بھی جینے کا حوصلہ ہے کیا

جا رہے ہو نظر چرائے ہوئے

میرے ہاتھوں میں آئنہ ہے کیا

اشک آنکھوں کے خشک ہونے لگے

اس نے وعدہ کوئی کیا ہے کیا

زندگی تو گزر ہی جائے گی

غیر کا کوئی آسرا ہے کیا

مسکرانے لگیں مری آنکھیں

آج ویرانہ دل کشا ہے کیا

گھل گیا ہے نشہ ہواؤں میں

در مے خانہ وا ہوا ہے کیا

کتنی سنجیدگی ہے چہرے پر

تو بھی ہر وقت سوچتا ہے کیا

آج دشمن ہے کل تو اپنا تھا

راز ہر ایک کھولتا ہے کیا

شور کرنے لگی ہیں زنجیریں

کوئی دیوانہ آ گیا ہے کیا

مسجدوں میں نمازیوں کا ہجوم

پھر کوئی حادثہ ہوا ہے کیا

بات کرتا ہے منزلوں کی بہت

راہبر یہ نیا نیا ہے کیا

اب تو خاموش ہو کے بیٹھ ندیمؔ

اس قدر کوئی بولتا ہے کیا