maut se jang kar raha hai kya

maut se jang kar rahā hai kyā

ab bhī jiine kā hausla hai kyā

jā rahe ho nazar churā.e hue

mere hāthoñ meñ aa.ina hai kyā

ashk āñkhoñ ke ḳhushk hone lage

us ne va.ada koī kiyā hai kyā

zindagī to guzar hī jā.egī

ġhair kā koī aasrā hai kyā

muskurāne lagīñ mirī āñkheñ

aaj vīrāna dil-kushā hai kyā

ghul gayā hai nasha havāoñ meñ

dar-e-mai-ḳhāna vā huā hai kyā

kitnī sanjīdgī hai chehre par

tū bhī har vaqt sochtā hai kyā

aaj dushman hai kal to apnā thā

raaz har ek kholtā hai kyā

shor karne lagī haiñ zanjīreñ

koī dīvāna aa gayā hai kyā

masjidoñ meñ namāziyoñ kā hujūm

phir koī hādisa huā hai kyā

baat kartā hai manziloñ kī bahut

rāhbar ye nayā nayā hai kyā

ab to ḳhāmosh ho ke baiTh 'nadīm'

is qadar koī boltā hai kyā

maut se jang kar raha hai kya

ab bhi jine ka hausla hai kya

ja rahe ho nazar churae hue

mere hathon mein aaina hai kya

ashk aankhon ke KHushk hone lage

us ne wada koi kiya hai kya

zindagi to guzar hi jaegi

ghair ka koi aasra hai kya

muskurane lagin meri aankhen

aaj virana dil-kusha hai kya

ghul gaya hai nasha hawaon mein

dar-e-mai-KHana wa hua hai kya

kitni sanjidgi hai chehre par

tu bhi har waqt sochta hai kya

aaj dushman hai kal to apna tha

raaz har ek kholta hai kya

shor karne lagi hain zanjiren

koi diwana aa gaya hai kya

masjidon mein namaziyon ka hujum

phir koi hadisa hua hai kya

baat karta hai manzilon ki bahut

rahbar ye naya naya hai kya

ab to KHamosh ho ke baiTh 'nadim'

is qadar koi bolta hai kya