maut se zist KHauf khati hai

maut se ziist ḳhauf khātī hai

maut aate hī bhaag jaatī hai

zindagī umr bhar Darātī hai

maut har ḳhauf ko bhagātī hai

zindagī har qadam satātī hai

maut āġhosh meñ sulātī hai

ziist rāh-e-ġhalat batātī hai

maut rāh-e-sahī dikhātī hai

zindagī dard-e-dil baḌhātī hai

maut har dard ko miTātī hai

zindagī Thokareñ lagātī hai

maut aakar unheñ bhulātī hai

zindagī baḳhshtī hai jo aañsū

maut aakar unheñ sukhātī hai

kyā ajab hai ki ziist insāñ ko

haath aa.e na phir bhī bhātī hai

ziist jin ko aziiz hai 'aḳhtar'

maut kab un ko yaad aatī hai

maut se zist KHauf khati hai

maut aate hi bhag jati hai

zindagi umr bhar Daraati hai

maut har KHauf ko bhagati hai

zindagi har qadam satati hai

maut aaghosh mein sulati hai

zist rah-e-ghalat batati hai

maut rah-e-sahi dikhati hai

zindagi dard-e-dil baDhati hai

maut har dard ko miTati hai

zindagi Thokaren lagati hai

maut aakar unhen bhulati hai

zindagi baKHshti hai jo aansu

maut aakar unhen sukhati hai

kya ajab hai ki zist insan ko

hath aae na phir bhi bhati hai

zist jin ko aziz hai 'aKHtar'

maut kab un ko yaad aati hai