mazhab-e-ishq ke irfan pe hairan nikla

maz.hab-e-ishq ke irfān pe hairāñ niklā

qais jab dasht ko niklā to pareshāñ niklā

shiddat-e-shauq meñ sarmast-o-shādāñ niklā

ġham-rasīda bhī agar thā to ġhazal-ḳhvāñ niklā

un se milne kī tamannā liye Dartā hī rahā

dil ye kāfir mirā dar-parda musalmāñ niklā

shaam aa.ī to lab-e-la.alīñ kī shoḳhī le kar

mehr bikhrāte hue la.al-e-badaḳhshāñ niklā

jab ki parvāz-e-taḳhayyul ne bhī sūrat paalī

kitnā be-ma.anī sā ab taḳht-e-sulaimāñ niklā

jaane kab chupke se āñkhoñ ne dar-e-dil kholā

aayā ik baar to phir ghar se na mehmāñ niklā

ḳhvāb hī achchhe the TuuTe to huā ye ifshā

jis ko gulzār samajhte the bayābāñ niklā

qaidī-e-husn kī sarkār meñ peshī jo huī

ishq sarshār thā dīdār kā unvāñ niklā

dā.ere fikr ke mahdūd hoñ mumkin hī nahīñ

kab 'asar' mo'tarif-e-tañgī-e-dāmāñ niklā

mazhab-e-ishq ke irfan pe hairan nikla

qais jab dasht ko nikla to pareshan nikla

shiddat-e-shauq mein sarmast-o-shadan nikla

gham-rasida bhi agar tha to ghazal-KHwan nikla

un se milne ki tamanna liye Darta hi raha

dil ye kafir mera dar-parda musalman nikla

sham aai to lab-e-lalin ki shoKHi le kar

mehr bikhraate hue lal-e-badaKHshan nikla

jab ki parwaz-e-taKHayyul ne bhi surat pali

kitna be-mani sa ab taKHt-e-sulaiman nikla

jaane kab chupke se aankhon ne dar-e-dil khola

aaya ek bar to phir ghar se na mehman nikla

KHwab hi achchhe the TuTe to hua ye ifsha

jis ko gulzar samajhte the bayaban nikla

qaidi-e-husn ki sarkar mein peshi jo hui

ishq sarshaar tha didar ka unwan nikla

daere fikr ke mahdud hon mumkin hi nahin

kab 'asar' mo'tarif-e-tangi-e-daman nikla