mazhab ka ho kyunkar ilm-o-amal dil hi nahin bhai ek taraf

maz.hab kā ho kyūñkar ilm-o-amal dil hī nahīñ bhaa.ī ek taraf

cricket kī khilā.ī ek taraf collage kī paḌhā.ī ek taraf

kyā zauq-e-ibādat ho un ko jo bas ke laboñ ke shaidā haiñ

halvā-e-bahishtī ek taraf hotel kī miThā.ī ek taraf

tā.ūn-o-tap aur khaTmal machchhar sab kuchh hai ye paidā kīchaḌ se

bambe kī ravānī ek taraf aur saarī safā.ī ek taraf

maz.hab kā to dam vo bharte haiñ be-parda butoñ ko karte haiñ

islām kā da.avā ek taraf ye kāfir-adā.ī ek taraf

har samt to hai ek dām-e-balā rah sakte haiñ ḳhush kis tarah bhalā

aġhyār kī kāvish ek taraf aapas kī laḌā.ī ek taraf

kyā kaam chale kyā rañg jame kyā baat bane kaun us kī sune

hai 'akbar'-e-bekas ek taraf aur saarī ḳhudā.ī ek taraf

fariyād kiye jā ai 'akbar' kuchh ho hī rahegā āḳhir-kār

allāh se tauba ek taraf sāhab kī duhā.ī ek taraf

mazhab ka ho kyunkar ilm-o-amal dil hi nahin bhai ek taraf

cricket ki khilai ek taraf collage ki paDhai ek taraf

kya zauq-e-ibaadat ho un ko jo bas ke labon ke shaida hain

halwa-e-bahishti ek taraf hotel ki miThai ek taraf

taun-o-tap aur khaTmal machchhar sab kuchh hai ye paida kichaD se

bambe ki rawani ek taraf aur sari safai ek taraf

mazhab ka to dam wo bharte hain be-parda buton ko karte hain

islam ka dawa ek taraf ye kafir-adai ek taraf

har samt to hai ek dam-e-bala rah sakte hain KHush kis tarah bhala

aghyar ki kawish ek taraf aapas ki laDai ek taraf

kya kaam chale kya rang jame kya baat bane kaun us ki sune

hai 'akbar'-e-bekas ek taraf aur sari KHudai ek taraf

fariyaad kiye ja ai 'akbar' kuchh ho hi rahega aaKHir-kar

allah se tauba ek taraf sahab ki duhai ek taraf