mazhab ki mere yar agar justuju karen

maz.hab kī mere yaar agar justujū kareñ

marte hue mirā na sū-e-qibla rū kareñ

thā maiñ sharāb-dost bahut, merī ḳhaak ke

kaase banāne chāhiyeñ kuchh, kuchh subū kareñ

mazkūr mere girye kā ho jis jagah vahāñ

ahl-e-namāz jā-e-tayammum vazū kareñ

bāñg-e-zabīh ho na kabhī āshnā-e-gosh

kyūñ-kar tire shahīd fuġhāñ be-gulū kareñ

gar tū sune to silsila-e-zulf ke asiir

sharh-e-niyāz-mandī-e-dil mū-ba-mū kareñ

us ke dahān-e-tañg meñ jā-e-suḳhan nahīñ

ham guftugū kareñ bhī to kyā guftugū kareñ

tālib haiñ dil se husn-e-mohabbat-fazā ke ham

is se ziyāda aur tujhe ḳhūb-rū kareñ

zindāñ meñ us ke haiñ to ka.ī be-gunah asiir

ġhālib ki roz-e-īd inheñ surḳh-rū kareñ

da.ave meñ tere ishq ke sādiq na ho sake

sharmindagī se kyūñki na ham sar-farū kareñ

charḳh-e-hazār-raḳhna kā paivand kyūñki ho

ye shaal vo nahīñ hai ki jis ko rafū kareñ

khulvā do un kī fasd ki dīvāne haiñ vo shaḳhs

jo fasl-e-gul meñ merā garebāñ rafū kareñ

ye chāhiye hai ham ko ki ham sab se mil chaleñ

ai 'mus.hafī' kisī ko na apnā adū kareñ

mazhab ki mere yar agar justuju karen

marte hue mera na su-e-qibla ru karen

tha main sharab-dost bahut, meri KHak ke

kase banane chahiyen kuchh, kuchh subu karen

mazkur mere girye ka ho jis jagah wahan

ahl-e-namaz ja-e-tayammum wazu karen

bang-e-zabih ho na kabhi aashna-e-gosh

kyun-kar tere shahid fughan be-gulu karen

gar tu sune to silsila-e-zulf ke asir

sharh-e-niyaz-mandi-e-dil mu-ba-mu karen

us ke dahan-e-tang mein ja-e-suKHan nahin

hum guftugu karen bhi to kya guftugu karen

talib hain dil se husn-e-mohabbat-faza ke hum

is se ziyaada aur tujhe KHub-ru karen

zindan mein us ke hain to kai be-gunah asir

ghaalib ki roz-e-id inhen surKH-ru karen

dawe mein tere ishq ke sadiq na ho sake

sharmindagi se kyunki na hum sar-faru karen

charKH-e-hazar-raKHna ka paiwand kyunki ho

ye shaal wo nahin hai ki jis ko rafu karen

khulwa do un ki fasd ki diwane hain wo shaKHs

jo fasl-e-gul mein mera gareban rafu karen

ye chahiye hai hum ko ki hum sab se mil chalen

ai 'mushafi' kisi ko na apna adu karen