subhen kaisi aag lagane wali thin

sub.heñ kaisī aag lagāne vaalī thiiñ

shāmeñ kaisī dhuāñ uThāne vaalī thiiñ

kaisā athāh samundar thā vo ḳhayāloñ kā

maujeñ kitnā shor machāne vaalī thiiñ

darvāze sab dil meñ aa kar khilte the

dīvāreñ chehroñ ko dikhāne vaalī thiiñ

rastoñ meñ zinda thī aahaT qadmoñ kī

galiyāñ kyā ḳhushbū mahkāne vaalī thiiñ

barsāteñ zaḳhmoñ ko harā kar detī thiiñ

aur havā.eñ phuul khilāne vaalī thiiñ

kaisī vīrānī ab in pe barastī hai

ye āñkheñ to diye jalāne vaalī thiiñ

in bātoñ se dil kā ḳhazāna ḳhālī hai

vo bāteñ jo agle zamāne vaalī thiiñ

subhen kaisi aag lagane wali thin

shamen kaisi dhuan uThane wali thin

kaisa athah samundar tha wo KHayalon ka

maujen kitna shor machane wali thin

darwaze sab dil mein aa kar khilte the

diwaren chehron ko dikhane wali thin

raston mein zinda thi aahaT qadmon ki

galiyan kya KHushbu mahkane wali thin

barsaten zaKHmon ko hara kar deti thin

aur hawaen phul khilane wali thin

kaisi virani ab in pe barasti hai

ye aankhen to diye jalane wali thin

in baaton se dil ka KHazana KHali hai

wo baaten jo agle zamane wali thin