meyar apna humne giraya nahin kabhi

me'yār apnā ham ne girāyā nahīñ kabhī

jo gir gayā nazar se vo bhāyā nahīñ kabhī

ham āshnā the maujoñ ke barham mizāj se

paanī pe koī naqsh banāyā nahīñ kabhī

hirs-o-havas ko ham ne banāyā nahīñ shi'ār

aur apnā e'tibār gañvāyā nahīñ kabhī

ik baar us kī āñkhoñ meñ dekhī thī be-ruḳhī

phir us ke baa'd yaad vo aayā nahīñ kabhī

tanhā.iyoñ kā raaj hai dil meñ tumhāre baa'd

ham ne kisī ko is meñ basāyā nahīñ kabhī

'tasnīm' jī rahe haiñ baḌe hausle ke saath

nākāmiyoñ pe shor machāyā nahīñ kabhī

me'yar apna hum ne giraya nahin kabhi

jo gir gaya nazar se wo bhaya nahin kabhi

hum aashna the maujon ke barham mizaj se

pani pe koi naqsh banaya nahin kabhi

hirs-o-hawas ko hum ne banaya nahin shi'ar

aur apna e'tibar ganwaya nahin kabhi

ek bar us ki aankhon mein dekhi thi be-ruKHi

phir us ke ba'd yaad wo aaya nahin kabhi

tanhaiyon ka raj hai dil mein tumhaare ba'd

hum ne kisi ko is mein basaya nahin kabhi

'tasnim' ji rahe hain baDe hausle ke sath

nakaamiyon pe shor machaya nahin kabhi