mear-e-suKHan hun na koi azmat-e-fan hun

me.ār-e-suḳhan huuñ na koī azmat-e-fan huuñ

baḌhte hue pathrāv meñ shīshe kā badan huuñ

is tarah mujhe dekh rahā hai koī jaise

maiñ duur ke jalte hue ḳhvāboñ kī thakan huuñ

sau baar añdheroñ ne jise qatl kiyā hai

taḳhlīq ke māthe kī vahī ek kiran huuñ

āvāz-e-anal-haq kī tarah saath hī tere

ik umr se ai silsila-e-dār-o-rasan huuñ

zaḳhmoñ ke jharoke meñ koī sham.a jalā kar

kahtā hai maiñ kuchh aur nahīñ dard-e-vatan huuñ

haiñ jis ke liye aaj na.e lafz-o-ma.ānī

tārīḳh kā vo nashsha-e-sahbā-e-kuhan huuñ

sahrā kā sulagtā huā ehsās huuñ 'jāmī'

zarroñ kī tarah dahr meñ bikhrā huā tan huuñ

mear-e-suKHan hun na koi azmat-e-fan hun

baDhte hue pathraw mein shishe ka badan hun

is tarah mujhe dekh raha hai koi jaise

main dur ke jalte hue KHwabon ki thakan hun

sau bar andheron ne jise qatl kiya hai

taKHliq ke mathe ki wahi ek kiran hun

aawaz-e-anal-haq ki tarah sath hi tere

ek umr se ai silsila-e-dar-o-rasan hun

zaKHmon ke jharoke mein koi shama jala kar

kahta hai main kuchh aur nahin dard-e-watan hun

hain jis ke liye aaj nae lafz-o-maani

tariKH ka wo nashsha-e-sahba-e-kuhan hun

sahra ka sulagta hua ehsas hun 'jami'

zarron ki tarah dahr mein bikhra hua tan hun