habs-e-darun pe jism-e-giran-bar sang tha

habs-e-darūñ pe jism-e-girāñ-bār sañg thā

vahshat pe merī arsa-e-āfāq tañg thā

kuchh duur tak sahāb-e-rifāqat rahā rafīq

phir ehtamām-e-bārish-e-tīr-o-tafañg thā

sahmī huī fazā-e-ġhazālāñ ke rū-ba-rū

jañgal thā qahqahe the ḳhudā thā maiñ dañg thā

ab shahr-e-justujū meñ tire baad kuchh nahīñ

ābādi-e-badan meñ jo dil thā malañg thā

jī ye kare hai aaj ki tanhā ji.eñ mareñ

kab mere iztirāb kā ye rañg-Dhañg thā

har shaam muzmahil sī saverā bujhā bujhā

tujh se pare jo dekhā yahī ek rañg thā

habs-e-darun pe jism-e-giran-bar sang tha

wahshat pe meri arsa-e-afaq tang tha

kuchh dur tak sahab-e-rifaqat raha rafiq

phir ehtamam-e-barish-e-tir-o-tafang tha

sahmi hui faza-e-ghazalan ke ru-ba-ru

jangal tha qahqahe the KHuda tha main dang tha

ab shahr-e-justuju mein tere baad kuchh nahin

aabaadi-e-badan mein jo dil tha malang tha

ji ye kare hai aaj ki tanha jien maren

kab mere iztirab ka ye rang-Dhang tha

har sham muzmahil si sawera bujha bujha

tujh se pare jo dekha yahi ek rang tha