mehr-o-ulfat se maal-e-tahzib

mehr-o-ulfat se ma.āl-e-tahzīb

ḳhāksārī hai kamāl-e-tahzīb

hai vo ārā.ish-e-husn-e-bātin

jis ko kahte haiñ jamāl-e-tahzīb

kam nahīñ mardumak-e-chashm se kuchh

ruḳh-e-insān pe ḳhāl-e-tahzīb

āj-kal ham meñ agar sach pūchho

shakl anqā hai misāl-e-tahzīb

kabhī hotā nahīñ bad-vaz.a kā ḳhauf

hai ajab jāh-o-jalāl-e-tahzīb

ruḳh pe kartā hai matānat paidā

dil meñ aate hī ḳhayāl-e-tahzīb

apne matlab kā jahāñ kuchh ho lagāv

nahīñ rahtā hai ḳhayāl-e-tahzīb

qaum kā apne na ghaTtā vo uruuj

ho na jaatā jo zavāl-e-tahzīb

jām-e-jam se hai kahīñ pur-tamkīñ

bazm-e-ḳhullat meñ sifāl-e-tahzīb

us kā ḳhuuñ karte haiñ jo nāhaq-kosh

un kī gardan pe vabāl-e-tahzīb

murda qaumoñ ke liye āb-e-hayāt

bantā jaatā hai zulāl-e-tahzīb

badr ban jā.egā chande meñ 'habīb'

haq ne chāhā to hilāl-e-tahzīb

mehr-o-ulfat se maal-e-tahzib

KHaksari hai kamal-e-tahzib

hai wo aaraish-e-husn-e-baatin

jis ko kahte hain jamal-e-tahzib

kam nahin mardumak-e-chashm se kuchh

ruKH-e-insan pe KHal-e-tahzib

aaj-kal hum mein agar sach puchho

shakl anqa hai misal-e-tahzib

kabhi hota nahin bad-waza ka KHauf

hai ajab jah-o-jalal-e-tahzib

ruKH pe karta hai matanat paida

dil mein aate hi KHayal-e-tahzib

apne matlab ka jahan kuchh ho lagaw

nahin rahta hai KHayal-e-tahzib

qaum ka apne na ghaTta wo uruj

ho na jata jo zawal-e-tahzib

jam-e-jam se hai kahin pur-tamkin

bazm-e-KHullat mein sifal-e-tahzib

us ka KHun karte hain jo nahaq-kosh

un ki gardan pe wabaal-e-tahzib

murda qaumon ke liye aab-e-hayat

banta jata hai zulal-e-tahzib

badr ban jaega chande mein 'habib'

haq ne chaha to hilal-e-tahzib