mehrban kis pe hain ab ahl-e-jafa mere baad

mehrbāñ kis pe haiñ ab ahl-e-jafā mere baa'd

kis ke ḳhirman pe girī barq-e-balā mere baa'd

ai nasīm-e-saharī ye to batā kaise haiñ

vo mire ham-nafas-o-sho.ala-navā mere baa'd

gard-e-ālām se ab kis kī jabīñ dhultī hai

kis ke ruḳh par hai masā.ib kī jilā mere baa'd

kaun ab marhala-e-dār-o-rasan tak pahuñchā

kyā hai ab sheva-e-arbāb-e-vafā mere baa'd

kis ne kī jur.at-e-rindāna-e-tajdīd-e-hayāt

kaun vaqf-e-ġham-e-ayyām huā mere baa'd

kaun hai jo pas-e-dīvār-e-qafas suntā hai

ahl-e-zindāñ jaras-e-gul kī sadā mere baa'd

bazm-e-shāhī meñ ba-sad-jāh-o-hasham kaun gayā

dosh par apne liye haq kī ridā mere baa'd

mus.haf-e-rū-e-dil-ārām-e-nigār-e-getī

kaun paḌhtā hai ba-sad sidq-o-safā mere baa'd

zahr-e-ġham hotā hai ab kis ko gavārā dekheñ

hai mukarrar lab-e-sāqī pe sadā mere baa'd

mehrban kis pe hain ab ahl-e-jafa mere ba'd

kis ke KHirman pe giri barq-e-bala mere ba'd

ai nasim-e-sahari ye to bata kaise hain

wo mere ham-nafas-o-shoala-nawa mere ba'd

gard-e-alam se ab kis ki jabin dhulti hai

kis ke ruKH par hai masaib ki jila mere ba'd

kaun ab marhala-e-dar-o-rasan tak pahuncha

kya hai ab shewa-e-arbab-e-wafa mere ba'd

kis ne ki jurat-e-rindana-e-tajdid-e-hayat

kaun waqf-e-gham-e-ayyam hua mere ba'd

kaun hai jo pas-e-diwar-e-qafas sunta hai

ahl-e-zindan jaras-e-gul ki sada mere ba'd

bazm-e-shahi mein ba-sad-jah-o-hasham kaun gaya

dosh par apne liye haq ki rida mere ba'd

mushaf-e-ru-e-dil-aram-e-nigar-e-geti

kaun paDhta hai ba-sad sidq-o-safa mere ba'd

zahr-e-gham hota hai ab kis ko gawara dekhen

hai mukarrar lab-e-saqi pe sada mere ba'd