mehrban mujh pe dam-e-naza wo gulfam hua

mehrbāñ mujh pe dam-e-naz.a vo gulfām huā

baare āġhāz se behtar mirā anjām huā

kabhī aatā nahīñ yaañ harf-e-shikāyat lab tak

kyā zabāñ par bhī musallat dil-e-nākām huā

qaid-e-hastī se rihā hūñgā na be-maut aa.e

mujh se vahshī ke liye tār-e-nafas daam huā

shāna kahtā hai mire dil se muḳhātib ho kar

jo phañsā zulf meñ vo morid-e-ālām huā

dahan-e-yār ke mazmūñ jo ġhazal meñ dekhe

log kahne lage shā.ir ko ye ilhām huā

harf-e-ruḳhsat to zabāñ par tire aaya bhī na thā

muztarib pahle hī kyoñ ye dil-e-nākām huā

apne saaqī kī shikāyat nahīñ kartā lekin

duur kaisā hai ki mamlū na mirā jaam huā

rang faq māh-e-munavvar kā huā gardūñ par

jalva-farmā vo parī-rū jo lab-e-bām huā

is zamāne meñ vo jaadū hai ḳhushāmad kā kalām

jis ne 'tālib' sunā vo banda-e-be-dām huā

mehrban mujh pe dam-e-naza wo gulfam hua

bare aaghaz se behtar mera anjam hua

kabhi aata nahin yan harf-e-shikayat lab tak

kya zaban par bhi musallat dil-e-nakaam hua

qaid-e-hasti se riha hunga na be-maut aae

mujh se wahshi ke liye tar-e-nafas dam hua

shana kahta hai mere dil se muKHatib ho kar

jo phansa zulf mein wo morid-e-alam hua

dahan-e-yar ke mazmun jo ghazal mein dekhe

log kahne lage shair ko ye ilham hua

harf-e-ruKHsat to zaban par tere aaya bhi na tha

muztarib pahle hi kyon ye dil-e-nakaam hua

apne saqi ki shikayat nahin karta lekin

dur kaisa hai ki mamlu na mera jam hua

rang faq mah-e-munawwar ka hua gardun par

jalwa-farma wo pari-ru jo lab-e-baam hua

is zamane mein wo jadu hai KHushamad ka kalam

jis ne 'talib' suna wo banda-e-be-dam hua