mehrban mujh pe ho ai rashk-e-qamar aaj ki raat

mehrbāñ mujh pe ho ai rashk-e-qamar aaj kī raat

aa mire chāñd ke TukḌe mire ghar aaj kī raat

raah bhuul aayā hai ik chāñd idhar aaj kī raat

kaisī ghar baiThī hai daulat mire ghar aaj kī raat

yaar aayā nahīñ kyuuñ kar ho basar aaj kī raat

tā-qayāmat nahīñ hone kī sahar aaj kī raat

aap se aap vo aa.e mire ghar aaj kī raat

dīn-o-duniyā kī nahīñ mujh ko ḳhabar aaj kī raat

kyuuñ ḳhafā mujh se hai vo rashk-e-qamar aaj kī raat

badlī badlī nazar aatī hai nazar aaj kī raat

ai sanam bahr-e-ḳhudā aap hī laa.eñ tashrīf

putliyoñ kā hai tamāshā mire ghar aaj kī raat

sādgī hai tirī pariyoñ kī banāvaT se sivā

sub.h ho jā.egī itnā na nikhar aaj kī raat

zulf suljhāte hue pyaar se vo dekhte haiñ

kyā maiñ ho jā.ūñgā manzūr-e-nazar aaj kī raat

merī gustāḳhī na yaad aa.e ilāhī hargiz

un ko bekal na kare fikr-e-kamar aaj kī raat

maañg motī se bharī hai na chaḌho koThe par

tum ko lag jā.egī tāroñ kī nazar aaj kī raat

lailatul-qadr hai ye yā shab-e-me.arāj hai ye

yaar ke zaanū pe apnā jo hai sar aaj kī raat

vasl ik parda-nashīñ se hai na ho ġhair kā daḳhl

sham.a tak aa.e na parvāne kā par aaj kī raat

mehmāñ aap bas itnā hī raheñ mere ghar

kal kā roz aaj kā din chaar pahar aaj kī raat

kal na dūñgā tujhe taklīf kuchh aisī vallāh

khol de band-e-qabā sharm na kar aaj kī raat

jalva kyā ḳhuub hai mahtābī kā mahtābī par

lutf-e-mai-noshī hai ai rashk-e-qamar aaj kī raat

bāġh-o-mai chāñdnī aur vasl-e-parī hai mujh ko

piite haiñ mere adū ḳhūn-e-jigar aaj kī raat

gul-badan pahne haiñ vo mahram-e-kamḳhāb nahīñ

niiñd aane kā mire dil meñ hai Dar aaj kī raat

kis zabāñ se ho bayāñ aao gale lag jaao

dil se dil hī sune kuchh dard-e-jigar aaj kī raat

baḳht-e-be-dār se vo chāñd mire haath aayā

āsmāñ tak haiñ mire dast-nigar aaj kī raat

haath se zulf vo suljhā.eñ to ho jā.ūñ nihāl

dekh luuñ naḳhl-e-tamannā ke samar aaj kī raat

āshiq-e-abrū ko kyā qatl karoge nādāñ

nannhī talvār jo hai zeb-e-kamar aaj kī raat

yaar kī zulf-e-zar-afshāñ mujhe yaad aatī hai

kyā hī siine se nikalte haiñ sharar aaj kī raat

bashkan-o-bashkan miinā kī sadā ko sun kar

aane paa.e na kahīñ miim basar aaj kī raat

gore gāloñ se na sarkāo siyah-zulfoñ ko

ḳhauf hai mujh ko na ho jaa.e sahar aaj kī raat

āshiq-e-zulf ko do bosa-o-ḳhatt-o-abrū

mus.haf-e-ruḳh pe likhūñ zer-o-zabar aaj kī raat

raqs is zohra-jabīñ kā hai adū ke ghar meñ

mehr mīzāñ meñ hai aqrab meñ qamar aaj kī raat

haath vo joḌte haiñ sar hai mirā qadmoñ par

ho na samjhāne manāne meñ sahar aaj kī raat

ḳhufta-baḳhtī se ilāhī ye kahīñ so jaa.eñ

topchī zāhid-o-murġhān-e-sahar aaj kī raat

gul-e-shabbū hai lajā lo gul-e-sūdī hai gulāb

sharm-o-ġhussa hai araq meñ vo haiñ tar aaj kī raat

āsmāñ par hai dimāġh ab nahīñ milne ke 'nasīm'

mehrbāñ un pe hai ik rashk-e-qamar aaj kī raat

mehrban mujh pe ho ai rashk-e-qamar aaj ki raat

aa mere chand ke TukDe mere ghar aaj ki raat

rah bhul aaya hai ek chand idhar aaj ki raat

kaisi ghar baiThi hai daulat mere ghar aaj ki raat

yar aaya nahin kyun kar ho basar aaj ki raat

ta-qayamat nahin hone ki sahar aaj ki raat

aap se aap wo aae mere ghar aaj ki raat

din-o-duniya ki nahin mujh ko KHabar aaj ki raat

kyun KHafa mujh se hai wo rashk-e-qamar aaj ki raat

badli badli nazar aati hai nazar aaj ki raat

ai sanam bahr-e-KHuda aap hi laen tashrif

putliyon ka hai tamasha mere ghar aaj ki raat

sadgi hai teri pariyon ki banawaT se siwa

subh ho jaegi itna na nikhar aaj ki raat

zulf suljhate hue pyar se wo dekhte hain

kya main ho jaunga manzur-e-nazar aaj ki raat

meri gustaKHi na yaad aae ilahi hargiz

un ko bekal na kare fikr-e-kamar aaj ki raat

mang moti se bhari hai na chaDho koThe par

tum ko lag jaegi taron ki nazar aaj ki raat

lailatul-qadr hai ye ya shab-e-mearaj hai ye

yar ke zanu pe apna jo hai sar aaj ki raat

wasl ek parda-nashin se hai na ho ghair ka daKHl

shama tak aae na parwane ka par aaj ki raat

mehman aap bas itna hi rahen mere ghar

kal ka roz aaj ka din chaar pahar aaj ki raat

kal na dunga tujhe taklif kuchh aisi wallah

khol de band-e-qaba sharm na kar aaj ki raat

jalwa kya KHub hai mahtabi ka mahtabi par

lutf-e-mai-noshi hai ai rashk-e-qamar aaj ki raat

bagh-o-mai chandni aur wasl-e-pari hai mujh ko

pite hain mere adu KHun-e-jigar aaj ki raat

gul-badan pahne hain wo mahram-e-kamKHab nahin

nind aane ka mere dil mein hai Dar aaj ki raat

kis zaban se ho bayan aao gale lag jao

dil se dil hi sune kuchh dard-e-jigar aaj ki raat

baKHt-e-be-dar se wo chand mere hath aaya

aasman tak hain mere dast-nigar aaj ki raat

hath se zulf wo suljhaen to ho jaun nihaal

dekh lun naKHl-e-tamanna ke samar aaj ki raat

aashiq-e-abru ko kya qatl karoge nadan

nannhi talwar jo hai zeb-e-kamar aaj ki raat

yar ki zulf-e-zar-afshan mujhe yaad aati hai

kya hi sine se nikalte hain sharar aaj ki raat

bashkan-o-bashkan mina ki sada ko sun kar

aane pae na kahin mim basar aaj ki raat

gore galon se na sarkao siyah-zulfon ko

KHauf hai mujh ko na ho jae sahar aaj ki raat

aashiq-e-zulf ko do bosa-o-KHatt-o-abru

mushaf-e-ruKH pe likhun zer-o-zabar aaj ki raat

raqs is zohra-jabin ka hai adu ke ghar mein

mehr mizan mein hai aqrab mein qamar aaj ki raat

hath wo joDte hain sar hai mera qadmon par

ho na samjhane manane mein sahar aaj ki raat

KHufta-baKHti se ilahi ye kahin so jaen

topchi zahid-o-murghan-e-sahar aaj ki raat

gul-e-shabbu hai laja lo gul-e-sudi hai gulab

sharm-o-ghussa hai araq mein wo hain tar aaj ki raat

aasman par hai dimagh ab nahin milne ke 'nasim'

mehrban un pe hai ek rashk-e-qamar aaj ki raat