mehrban pate nahin tere tain yak aan hum

mehrbāñ paate nahīñ tere ta.iiñ yak aan ham

phir bhalā dil ke nikāleñ kis tarah armān ham

har qadam par jis ke ejāz-e-masīhā.ī fidā

us adā us naaz us raftār ke qurbān ham

umr bhar saaqī na chhoḌī mai-kada kī bandagī

ek hī paimāne par karte haiñ ye paimān ham

koī to dāvat batā do is tarah kī shaiḳh jī

ek shab to apne ghar is ko rakheñ mehmān ham

haañ magar salvāt paḌhnā dekh tujh ko dam-ba-dam

aur kyā rakhte haiñ terī shaan ke shāyān ham

jī meñ ham barpā kareñ zanjīr kā ġhul ai junūñ

vādi-majnūñ ko dekheñ kis tarah sunsān ham

raat din sohbat hai jin ko be-takalluf aap se

pūchhnā kyā vo to behtar haiñ bhalā ai jaan ham

tū ne duz-dīda nigāheñ jab laḌā.īñ ġhair se

ho ga.e nā-chār pyāre jaan kar anjān ham

ham-nashīñ sarkār ke hī jā-ba-jā ġhammāz haiñ

kījiye tahqīq ise karte nahīñ bohtān ham

sair ko aatā hai vo 'īmān' jā kar baaġh meñ

khol deveñ chaar din aage hī gul ke kaan ham

mehrban pate nahin tere tain yak aan hum

phir bhala dil ke nikalen kis tarah arman hum

har qadam par jis ke ejaz-e-masihai fida

us ada us naz us raftar ke qurban hum

umr bhar saqi na chhoDi mai-kada ki bandagi

ek hi paimane par karte hain ye paiman hum

koi to dawat bata do is tarah ki shaiKH ji

ek shab to apne ghar is ko rakhen mehman hum

han magar salwat paDhna dekh tujh ko dam-ba-dam

aur kya rakhte hain teri shan ke shayan hum

ji mein hum barpa karen zanjir ka ghul ai junun

wadi-majnun ko dekhen kis tarah sunsan hum

raat din sohbat hai jin ko be-takalluf aap se

puchhna kya wo to behtar hain bhala ai jaan hum

tu ne duz-dida nigahen jab laDain ghair se

ho gae na-chaar pyare jaan kar anjaan hum

ham-nashin sarkar ke hi ja-ba-ja ghammaz hain

kijiye tahqiq ise karte nahin bohtan hum

sair ko aata hai wo 'iman' ja kar bagh mein

khol dewen chaar din aage hi gul ke kan hum