mehwar pe bhi gardish meri mehwar se alag ho

mehvar pe bhī gardish mirī mehvar se alag ho

us bahr meñ tairūñ jo samundar se alag ho

apnā bhī falak ho magar aflāk se haT ke

ho bojh bhī sar kā to mire sar se alag ho

maiñ aisā sitāra huuñ tirī kāhkashāñ meñ

maujūd ho manzar meñ na manzar se alag ho

dīvār-e-numā.ish kī ḳharāshoñ kā huuñ maiñ rañg

har lamha vo dhāga hai jo chādar se alag ho

us ātish-e-afsūñ ko koī kaise bujhā.e

jis aag meñ ghar jaltā ho vo ghar se alag ho

chhatrī rakhūñ us abr-e-siyah-gām kī ḳhātir

kuufī bhī na ho aur bahattar se alag ho

rab aur tamannā-e-duī vahm-e-bashar hai

ham-zād to kyā aks bhī dāvar se alag ho

dāman meñ vo duniyā hai jo duniyā se judā hai

aa.e vo qayāmat bhī jo mahshar se alag ho

paare kī tarah shahr kā bikhrāo hai 'tafzīl'

aisā koī batlāo jo andar se alag ho

mehwar pe bhi gardish meri mehwar se alag ho

us bahr mein tairun jo samundar se alag ho

apna bhi falak ho magar aflak se haT ke

ho bojh bhi sar ka to mere sar se alag ho

main aisa sitara hun teri kahkashan mein

maujud ho manzar mein na manzar se alag ho

diwar-e-numaish ki KHarashon ka hun main rang

har lamha wo dhaga hai jo chadar se alag ho

us aatish-e-afsun ko koi kaise bujhae

jis aag mein ghar jalta ho wo ghar se alag ho

chhatri rakhun us abr-e-siyah-gam ki KHatir

kufi bhi na ho aur bahattar se alag ho

rab aur tamanna-e-dui wahm-e-bashar hai

ham-zad to kya aks bhi dawar se alag ho

daman mein wo duniya hai jo duniya se juda hai

aae wo qayamat bhi jo mahshar se alag ho

pare ki tarah shahr ka bikhrao hai 'tafzil'

aisa koi batlao jo andar se alag ho