mein aashiq hun mujhe maqtal mein apna nam karna hai

meñ āshiq huuñ mujhe maqtal meñ apnā naam karnā hai

Daregā ḳhanjar-e-qātil se kyā vo jis ko marnā hai

madad kar ishq-e-sādiq jazb-e-kāmil mujh se mahzūñ kī

shab-e-ġham naala karnā hai aur is jī se guzarnā hai

na pheñko sañg-e-ḳhārā par hifāzat chāhiye is kī

ki rakh kar mir.at-e-dil rū-ba-rū tum ko sañvarnā hai

ye jām-e-dīda-e-hasrat bharūñgā ashk-e-ḳhūnī se

mai-e-gulgūñ tujhe pīr-e-muġhāñ sāġhar meñ bharnā hai

Thahar jā bulbul-e-ġhamgīñ kahāñ tak zārī-o-shevan

ki murġh-e-bostān-e-ishq ko bhī naala karnā hai

sarishk-e-chashm-e-pur-nam kī ravānī se pareshāñ huuñ

junūñ kyā dīda-e-hasrat hamārā koī jharnā hai

'jamīla' saf.ha-e-mahtāb par lahrā ga.e kaale

sitam in gesuoñ kā dosh par un ke bikharnā hai

mein aashiq hun mujhe maqtal mein apna nam karna hai

Darega KHanjar-e-qatil se kya wo jis ko marna hai

madad kar ishq-e-sadiq jazb-e-kaamil mujh se mahzun ki

shab-e-gham nala karna hai aur is ji se guzarna hai

na phenko sang-e-KHara par hifazat chahiye is ki

ki rakh kar mirat-e-dil ru-ba-ru tum ko sanwarna hai

ye jam-e-dida-e-hasrat bharunga ashk-e-KHuni se

mai-e-gulgun tujhe pir-e-mughan saghar mein bharna hai

Thahar ja bulbul-e-ghamgin kahan tak zari-o-shewan

ki murgh-e-bostan-e-ishq ko bhi nala karna hai

sarishk-e-chashm-e-pur-nam ki rawani se pareshan hun

junun kya dida-e-hasrat hamara koi jharna hai

'jamila' safha-e-mahtab par lahra gae kale

sitam in gesuon ka dosh par un ke bikharna hai