mein peT se apne KHud hi kapDa uTha raha hun bata raha hun

meñ peT se apne ḳhud hī kapḌā uThā rahā huuñ batā rahā huuñ

maiñ apne bachchoñ ko aaj bhūkā sulā rahā huuñ batā rahā huuñ

bisāt se baḌh ke ḳharch ḳhud ko kiyā hai maiñ ne mirī ḳhatā hai

aur ab maiñ chādar se paañv apne chhupā rahā huuñ batā rahā huuñ

anā ko apnī maiñ apne hāthoñ se haar dūñgā yā maar dūñgā

ġhurūr ko apne ḳhaak meñ bhī milā rahā huuñ batā rahā huuñ

maiñ zabt kī āḳhirī hadoñ ko na jā sakūñgā maiñ ro paḌūñgā

maiñ baat karte hue tabhī kapkapā rahā huuñ batā rahā huuñ

ye ḳhush-libāsī ye rakh-rakhāv sivā dikhāve ke kuchh nahīñ hai

maiñ ek Topī hī sab ke sar pe ghumā rahā huuñ batā rahā huuñ

maiñ zulmat-e-shab.... kā shikva hargiz nahīñ karūñgā DaTā rahūñgā

maiñ apne hisse kī sham.a yaaro jalā rahā huuñ batā rahā huuñ

maiñ jāntā huuñ javāb terā nahīñ meñ hogā ajiib kyā hai

savāl karte hue tabhī hichkichā rahā huuñ batā rahā huuñ

mujhe to sab kuchh hī yaad hai maiñ sahar kā bhūlā nahīñ huuñ yaaro

maiñ shaam Dhalne se pahle hī ghar ko jā rahā huuñ batā rahā huuñ

le merī jānib se aaj badle kī intihā sun mirā elaañ sun

maiñ apnī nazroñ se aaj tujh ko girā rahā huuñ batā rahā huuñ

vajūd merā hai ḳhaak aur is ne ḳhaak meñ hī hai ḳhaak honā

maiñ ḳhaak ko āsmāñ kī jānib uḌā rahā huuñ batā rahā huuñ

ye sher to mujh se baiThe baiThe yūñhī hue haiñ kahe nahīñ haiñ

'razī' maiñ misre ke saath misra.a lagā rahā huuñ batā rahā huuñ

mein peT se apne KHud hi kapDa uTha raha hun bata raha hun

main apne bachchon ko aaj bhuka sula raha hun bata raha hun

bisat se baDh ke KHarch KHud ko kiya hai main ne meri KHata hai

aur ab main chadar se panw apne chhupa raha hun bata raha hun

ana ko apni main apne hathon se haar dunga ya mar dunga

ghurur ko apne KHak mein bhi mila raha hun bata raha hun

main zabt ki aaKHiri hadon ko na ja sakunga main ro paDunga

main baat karte hue tabhi kapkapa raha hun bata raha hun

ye KHush-libasi ye rakh-rakhaw siwa dikhawe ke kuchh nahin hai

main ek Topi hi sab ke sar pe ghuma raha hun bata raha hun

main zulmat-e-shab ka shikwa hargiz nahin karunga DaTa rahunga

main apne hisse ki shama yaro jala raha hun bata raha hun

main jaanta hun jawab tera nahin mein hoga ajib kya hai

sawal karte hue tabhi hichkicha raha hun bata raha hun

mujhe to sab kuchh hi yaad hai main sahar ka bhula nahin hun yaro

main sham Dhalne se pahle hi ghar ko ja raha hun bata raha hun

le meri jaanib se aaj badle ki intiha sun mera elan sun

main apni nazron se aaj tujh ko gira raha hun bata raha hun

wajud mera hai KHak aur is ne KHak mein hi hai KHak hona

main KHak ko aasman ki jaanib uDa raha hun bata raha hun

ye sher to mujh se baiThe baiThe yunhi hue hain kahe nahin hain

'razi' main misre ke sath misra laga raha hun bata raha hun