mein sochta hun jise aashna bhi hota hai

meñ sochtā huuñ jise āshnā bhī hotā hai

magar ḳhayāl se vo māvarā bhī hotā hai

sivā.e shā.irī zindāñ meñ kuchh kiyā hī nahīñ

vagarna band-e-qafas kholnā bhī hotā hai

ziyāda-tar maiñ anāsir se duur dekhūñ use

vo ḳhaak o ātish o aab o havā bhī hotā hai

maiñ TuuT jaatā huuñ aur duur jā bikhartā huuñ

agar judā.ī kā sadma zarā bhī hotā hai

har ek rāste par ham to jā ke dekheñ magar

jidhar na jaanā ho vo rāstā bhī hotā hai

usī ke dar ke faqat ho ke rah ga.e haiñ ham

sunā hai jab se ki darvāza vā bhī hotā hai

'zafar' vahāñ ki jahāñ ho koī bhī had qaa.em

faqat bashar nahīñ hotā ḳhudā bhī hotā hai

mein sochta hun jise aashna bhi hota hai

magar KHayal se wo mawara bhi hota hai

siwae shairi zindan mein kuchh kiya hi nahin

wagarna band-e-qafas kholna bhi hota hai

ziyaada-tar main anasir se dur dekhun use

wo KHak o aatish o aab o hawa bhi hota hai

main TuT jata hun aur dur ja bikharta hun

agar judai ka sadma zara bhi hota hai

har ek raste par hum to ja ke dekhen magar

jidhar na jaana ho wo rasta bhi hota hai

usi ke dar ke faqat ho ke rah gae hain hum

suna hai jab se ki darwaza wa bhi hota hai

'zafar' wahan ki jahan ho koi bhi had qaem

faqat bashar nahin hota KHuda bhi hota hai