mera fan meri ghazal tera ishaara to nahin

merā fan merī ġhazal terā ishārā to nahīñ

husn terā isī parde meñ ḳhud-ārā to nahīñ

dam-e-zulmat bhī jo āñkhoñ meñ hai tasvīr-e-sahar

haath kuchh is meñ bhī ai dost tumhārā to nahīñ

kākul-e-vaqt meñ suljhāv nazar aatā hai

aap ne zulf-e-pareshāñ ko sañvārā to nahīñ

mere ehsās kī vaadī meñ shafaq sī jhalkī

mujh ko doshīza-e-fitrat ne pukārā to nahīñ

dāman-e-husn se kuchh aur sulag uThtī hai

ishq kī aañkh meñ shabnam bhī sharārā to nahīñ

māntā huuñ ki kināre kī tamannā hai mujhe

maiñ ne tūfāñ se kiyā phir bhī kinārā to nahīñ

ḳhūn-e-gulshan hai pas-e-parda-e-ailān-e-bahār

dekhnā ġhuncha-e-nauras meñ sharārā to nahīñ

phir na.e sar se par-o-bāl meñ jumbish sī huī

nargis-e-shāhid-e-gul kā ye ishārā to nahīñ

tham ga.ī saut-e-jaras ruk ga.e rahbar ke qadam

kisī gum-karda-e-manzil ne pukārā to nahīñ

maiñ ne maanā tire kūche meñ qadam uTh na sake

ziist kī dauḌ meñ lekin kabhī haarā to nahīñ

mera fan meri ghazal tera ishaara to nahin

husn tera isi parde mein KHud-ara to nahin

dam-e-zulmat bhi jo aankhon mein hai taswir-e-sahar

hath kuchh is mein bhi ai dost tumhaara to nahin

kakul-e-waqt mein suljhaw nazar aata hai

aap ne zulf-e-pareshan ko sanwara to nahin

mere ehsas ki wadi mein shafaq si jhalki

mujh ko doshiza-e-fitrat ne pukara to nahin

daman-e-husn se kuchh aur sulag uThti hai

ishq ki aankh mein shabnam bhi sharara to nahin

manta hun ki kinare ki tamanna hai mujhe

main ne tufan se kiya phir bhi kinara to nahin

KHun-e-gulshan hai pas-e-parda-e-ailan-e-bahaar

dekhna ghuncha-e-nauras mein sharara to nahin

phir nae sar se par-o-baal mein jumbish si hui

nargis-e-shahid-e-gul ka ye ishaara to nahin

tham gai saut-e-jaras ruk gae rahbar ke qadam

kisi gum-karda-e-manzil ne pukara to nahin

main ne mana tere kuche mein qadam uTh na sake

zist ki dauD mein lekin kabhi haara to nahin