میرا خاموش رہنا بھی حقیقت میں فغاں ہوگا

میرا خاموش رہنا بھی حقیقت میں فغاں ہوگا

فسانہ درد دل کا اشک بن بن کر عیاں ہوگا

حرم سے واسطہ کیا دیر سے ہم کو غرض کیا ہے

جہاں ہم سر جھکائیں گے تمہارا آستاں ہوگا

خبر کیا تھی محبت میں نہ چین آئے گا دم بھر بھی

زمیں سے آسماں تک آسماں ہی آسماں ہوگا

کہاں تک برق اور گلچیں اجاڑیں گے جلائیں گے

چمن کی ڈالی ڈالی پر ہمارا آشیاں ہوگا

محبت میں ہمیں اے دردؔ راحت مل نہیں سکتی

اگر وہ مہرباں ہوگا تو دل نا مہرباں ہوگا