mera kitna KHayal karte ho

merā kitnā ḳhayāl karte ho

saañs lenā muhāl karte ho

ho vahāñ bhī jahāñ nahīñ maujūd

tum ye kaisā kamāl karte ho

ishq meñ hijr-o-vasl be-ma.anī

kis liye tum malāl karte ho

jānte ho ki ham tumhāre haiñ

phir bhī dil pā.emāl karte ho

ham ne dekhā hai ik zamāne ko

zindagī kyuuñ vabāl karte ho

mere iḳhlās kā karishma hai

jism-o-jāñ ko nihāl karte ho

kaun kyā hai ye jāntī huuñ 'sabīn'

us se tum kyā savāl karte ho

mera kitna KHayal karte ho

sans lena muhaal karte ho

ho wahan bhi jahan nahin maujud

tum ye kaisa kamal karte ho

ishq mein hijr-o-wasl be-mani

kis liye tum malal karte ho

jaante ho ki hum tumhaare hain

phir bhi dil paemal karte ho

hum ne dekha hai ek zamane ko

zindagi kyun wabaal karte ho

mere iKHlas ka karishma hai

jism-o-jaan ko nihaal karte ho

kaun kya hai ye jaanti hun 'sabin'

us se tum kya sawal karte ho