mera maqsud-e-nazar lauh-e-muqaddar mein nahin

merā maqsūd-e-nazar lauh-e-muqaddar meñ nahīñ

maiñ vo motī DhūñDhtā huuñ jo samundar meñ nahīñ

baat karne kī bhī ab fursat nahīñ shāyad use

maiñ ne jab āvāz dī kahlā diyā ghar meñ nahīñ

kis tarah se dhoiye chehre se gard-e-māh-o-sāl

itne aañsū bhī to apne dīda-e-tar meñ nahīñ

jagmagā saktī ho jis se ḳhāmushī kī reg-e-dil

itnī āb-o-tāb āvāzoñ ke ḳhanjar meñ nahīñ

vāhimoñ ke bhuut ġham ke saa.e sannāTe ke naag

kaun sā aaseb ai 'tāhir' mire ghar meñ nahīñ

mera maqsud-e-nazar lauh-e-muqaddar mein nahin

main wo moti DhunDhta hun jo samundar mein nahin

baat karne ki bhi ab fursat nahin shayad use

main ne jab aawaz di kahla diya ghar mein nahin

kis tarah se dhoiye chehre se gard-e-mah-o-sal

itne aansu bhi to apne dida-e-tar mein nahin

jagmaga sakti ho jis se KHamushi ki reg-e-dil

itni aab-o-tab aawazon ke KHanjar mein nahin

wahimon ke bhut gham ke sae sannaTe ke nag

kaun sa aaseb ai 'tahir' mere ghar mein nahin