mera mazaq-e-ishq hai ruswa kahen jise

merā mazāq-e-ishq hai rusvā kaheñ jise

hai raaz terā husn-e-muamma kaheñ jise

paidā kahā hai koī ki tujh sā kaheñ jise

tere sivā hai kaun piyārā kaheñ jise

phir kashtī-e-umīd ho sāhil se ham-kanār

itnā hī ho karam ki sahārā kaheñ jise

tā-zīst bekalī rahe tere firāq meñ

jaarī hoñ aise ashk ki dariyā kaheñ jise

ka.aba hai terā ghar dil-e-shaidā hai terā ghar

lekin vo aur kaun hai tujh sā kaheñ jise

ai barq-e-husn phūñk de mujh ko kuchh is tarah

sab dīda-e-kalīm kā surma kaheñ jise

phir kashtī-e-murād ko sāhil ke paas lā

phir maujzan ho rahm kā dariyā kaheñ jise

tūfān-e-ma.asiyat se mile jald-tar najāt

Daal aisī ik nazar ki vasīla kaheñ jise

nāhaq marīz-e-ishq kā karte haiñ vo ilaaj

taqdīr meñ kahāñ hai mudāvā kaheñ jise

paidā vo dard kar dil-e-ulfat-nasīb meñ

duniyā ke dekhne ko tamāshā kaheñ jise

dil ko tajalliyāt kī kirnoñ se de chamak

tārīkī-e-jahāñ kā ujālā kaheñ jise

nazzāra-e-jamāl se betāb ho na dil

vo zarf ho atā ki gavārā kaheñ jise

jo dil thā apnā mūnis-o-ġham-ḳhvār-o-jāñ-navāz

itnā kahāñ rahā hai ki apnā kaheñ jise

parde meñ chupke aah na kar tū hameñ ḳharāb

mil is tarah haqīqat-e-jalva kaheñ jise

dāmān-e-āfiyat hī ġhanīmat hai ai 'umar'

us par hī un ke zulm haiñ shaidā kaheñ jise

mera mazaq-e-ishq hai ruswa kahen jise

hai raaz tera husn-e-muamma kahen jise

paida kaha hai koi ki tujh sa kahen jise

tere siwa hai kaun piyara kahen jise

phir kashti-e-umid ho sahil se ham-kanar

itna hi ho karam ki sahaara kahen jise

ta-zist bekali rahe tere firaq mein

jari hon aise ashk ki dariya kahen jise

kaba hai tera ghar dil-e-shaida hai tera ghar

lekin wo aur kaun hai tujh sa kahen jise

ai barq-e-husn phunk de mujh ko kuchh is tarah

sab dida-e-kalim ka surma kahen jise

phir kashti-e-murad ko sahil ke pas la

phir maujzan ho rahm ka dariya kahen jise

tufan-e-masiyat se mile jald-tar najat

Dal aisi ek nazar ki wasila kahen jise

nahaq mariz-e-ishq ka karte hain wo ilaj

taqdir mein kahan hai mudawa kahen jise

paida wo dard kar dil-e-ulfat-nasib mein

duniya ke dekhne ko tamasha kahen jise

dil ko tajalliyat ki kirnon se de chamak

tariki-e-jahan ka ujala kahen jise

nazzara-e-jamal se betab ho na dil

wo zarf ho ata ki gawara kahen jise

jo dil tha apna munis-o-gham-KHwar-o-jaan-nawaz

itna kahan raha hai ki apna kahen jise

parde mein chupke aah na kar tu hamein KHarab

mil is tarah haqiqat-e-jalwa kahen jise

daman-e-afiyat hi ghanimat hai ai 'umar'

us par hi un ke zulm hain shaida kahen jise