mera shuur mujhko ye aazar de gaya

merā shu.ūr mujh ko ye āzār de gayā

sūraj kī tarah dīda-e-bedār de gayā

har phuul ik sharar hai to har shāḳh ek barq

jannat kā ḳhvāb dozaḳh-e-gulzār de gayā

lab-bastagī meñ hasrat-e-guftār jaag uThī

ḳhauf-e-sukūt jur.at-e-iz.hār de gayā

jaltā huuñ apnī aag meñ ḳhurshīd kī tarah

kaisī sazā ye sho.ala-e-pindār de gayā

mahv-e-suḳhan thā maiñ ki mirā aks hañs paḌā

ā.īne se nikal ke ye ash.ār de gayā

mera shuur mujh ko ye aazar de gaya

suraj ki tarah dida-e-bedar de gaya

har phul ek sharar hai to har shaKH ek barq

jannat ka KHwab dozaKH-e-gulzar de gaya

lab-bastagi mein hasrat-e-guftar jag uThi

KHauf-e-sukut jurat-e-izhaar de gaya

jalta hun apni aag mein KHurshid ki tarah

kaisi saza ye shoala-e-pindar de gaya

mahw-e-suKHan tha main ki mera aks hans paDa

aaine se nikal ke ye ashaar de gaya