میرا تو کیا خوشی میں رہوں یا ملال میں

میرا تو کیا خوشی میں رہوں یا ملال میں

تم خوش رہو جہاں بھی رہو جس خیال میں

ہوں محو میں تو ایسا کسی کے خیال میں

کچھ امتیاز ہی نہیں ہجر و وصال میں

تیرے خیال ہی کی بدولت ہے زندگی

تو ہے تو اک جہان ہے میرے خیال میں

حائل اگر ہزار ہوں پردے تو کچھ نہیں

تم ہو مری نگاہ میں دل میں خیال میں

ہوتا رہے کرم جو یوں ہی اے خیال یار

لغزش نہ ہو کبھی مرے پائے خیال میں

ہے تو تو ہر گھڑی مری آنکھوں کے سامنے

آتا ہوں میں بھی کیا کبھی تیرے خیال میں

شعر و سخن کی آرزوؔ اب داد کیا ملے

ذوق سخن ہی جب نہیں اہل کمال میں