mera to kya KHushi mein rahun ya malal mein

merā to kyā ḳhushī meñ rahūñ yā malāl meñ

tum ḳhush raho jahāñ bhī raho jis ḳhayāl meñ

huuñ mahv maiñ to aisā kisī ke ḳhayāl meñ

kuchh imtiyāz hī nahīñ hijr-o-visāl meñ

tere ḳhayāl hī kī badaulat hai zindagī

tū hai to ik jahān hai mere ḳhayāl meñ

haa.il agar hazār hoñ parde to kuchh nahīñ

tum ho mirī nigāh meñ dil meñ ḳhayāl meñ

hotā rahe karam jo yūñhī ai ḳhayāl-e-yār

laġhzish na ho kabhī mire pā-e-ḳhayāl meñ

hai tū to har ghaḌī mirī āñkhoñ ke sāmne

aatā huuñ maiñ bhī kyā kabhī tere ḳhayāl meñ

sher-o-suḳhan kī 'ārzū' ab daad kyā mile

zauq-e-suḳhan hī jab nahīñ ahl-e-kamāl meñ

mera to kya KHushi mein rahun ya malal mein

tum KHush raho jahan bhi raho jis KHayal mein

hun mahw main to aisa kisi ke KHayal mein

kuchh imtiyaz hi nahin hijr-o-visal mein

tere KHayal hi ki badaulat hai zindagi

tu hai to ek jahan hai mere KHayal mein

hail agar hazar hon parde to kuchh nahin

tum ho meri nigah mein dil mein KHayal mein

hota rahe karam jo yunhi ai KHayal-e-yar

laghzish na ho kabhi mere pa-e-KHayal mein

hai tu to har ghaDi meri aankhon ke samne

aata hun main bhi kya kabhi tere KHayal mein

sher-o-suKHan ki 'arzu' ab dad kya mile

zauq-e-suKHan hi jab nahin ahl-e-kamal mein