mera to nam ret ke sagar pe naqsh hai

merā to naam ret ke sāgar pe naqsh hai

phir kis kā naam hai jo tire dar pe naqsh hai

pheñkā thā ham pe jo kabhī us ko uThā ke dekh

jo kuchh lahū meñ thā usī patthar pe naqsh hai

shāyad idhar se guzrā hai ik baar tū kabhī

terī nazar kā lams jo manzar pe naqsh hai

terā ḳhayāl mujh se go mil kar bichhaḌ gayā

us kī mahak kā aks mire ghar pe naqsh hai

mere ḳhatoñ ko rakh ke sirhāne vo so gayā

jaagā to mere jism kā bistar pe naqsh hai

ab is meñ jo bhī Dāliye amrit se kam nahīñ

jo in laboñ pe thā vahī sāġhar pe naqsh hai

jo zaḳhm ik nazar se milā thā vo bhar gayā

dhuñdlā sā daaġh ruuh ke paikar pe naqsh hai

ḳhanjar chalā thā mujh pe magar mo.ajaza hai ye

qātil kā apnā ḳhuun hī ḳhanjar pe naqsh hai

'āzād' kaun thā jo tahoñ meñ utar gayā

kis kī hayāt hai jo samundar pe naqsh hai

mera to nam ret ke sagar pe naqsh hai

phir kis ka nam hai jo tere dar pe naqsh hai

phenka tha hum pe jo kabhi us ko uTha ke dekh

jo kuchh lahu mein tha usi patthar pe naqsh hai

shayad idhar se guzra hai ek bar tu kabhi

teri nazar ka lams jo manzar pe naqsh hai

tera KHayal mujh se go mil kar bichhaD gaya

us ki mahak ka aks mere ghar pe naqsh hai

mere KHaton ko rakh ke sirhane wo so gaya

jaga to mere jism ka bistar pe naqsh hai

ab is mein jo bhi Daliye amrit se kam nahin

jo in labon pe tha wahi saghar pe naqsh hai

jo zaKHm ek nazar se mila tha wo bhar gaya

dhundla sa dagh ruh ke paikar pe naqsh hai

KHanjar chala tha mujh pe magar moajaza hai ye

qatil ka apna KHun hi KHanjar pe naqsh hai

'azad' kaun tha jo tahon mein utar gaya

kis ki hayat hai jo samundar pe naqsh hai