mera ye jism to be-shak yahan hai

merā ye jism to be-shak yahāñ hai

magar dil to vahīñ hai tū jahāñ hai

jo rāh-e-zīst meñ har-sū dhuāñ hai

umīdoñ kā ġhubār-e-kārvāñ hai

umīdeñ bāñdh baḌh aage akele

ki rah jaatā yahīñ har kārvāñ hai

mirī maano to sīdhī raah chalnā

idhar khaa.ī udhar andhā kuaañ hai

tire sab kashT har ānand degā

vo letā pahle sab kā imtihāñ hai

ye āñkhoñ kī ajab dariyā-dilī hai

ḳhushī ho yā ki ġham aañsū ravāñ hai

hañsī meñ mat uḌā merī kahānī

tire jazbāt haiñ merī zabāñ hai

'nayā' kyuuñ tez hai dhaḌkan mire dil

vo shāyad aaj mujh pe mehrbāñ hai

mera ye jism to be-shak yahan hai

magar dil to wahin hai tu jahan hai

jo rah-e-zist mein har-su dhuan hai

umidon ka ghubar-e-karwan hai

umiden bandh baDh aage akele

ki rah jata yahin har karwan hai

meri mano to sidhi rah chalna

idhar khai udhar andha kuan hai

tere sab kashT har aanand dega

wo leta pahle sab ka imtihan hai

ye aankhon ki ajab dariya-dili hai

KHushi ho ya ki gham aansu rawan hai

hansi mein mat uDa meri kahani

tere jazbaat hain meri zaban hai

'naya' kyun tez hai dhaDkan mere dil

wo shayad aaj mujh pe mehrban hai