میرے آنگن کا نیا رنگ نظر آتا ہے

میرے آنگن کا نیا رنگ نظر آتا ہے

شام ہوتی ہے تو اک چاند اتر آتا ہے

کیا ہوا ہے مجھے کیوں گھر پہ مرے کل شب سے

جو بھی آتا ہے وہ با دیدۂ تر آتا ہے

جو بھی کہنا ہو وہ کہہ دیتی ہیں لفظوں کے بغیر

بات کرنے کا ان آنکھوں کو ہنر آتا ہے

اس کے سائے میں کئی عہد گزارے گئے ہیں

راستے میں جو مرے بوڑھا شجر آتا ہے

ایسا منظر کہاں رکتا ہے کسی کے روکے

باندھ کر پاؤں میں اپنے جو بھنور آتا ہے

ختم جس پر ہو گزرتے ہوئے لمحوں کا سفر

اک نیا سال اسی لمحے سے ابھر آتا ہے

ایک مدت سے بلا ناغہ سر شام اے نورؔ

قافلہ شہر نوا کا مرے گھر آتا ہے