mere afkar ne jis shai se jila pai hai

mere afkār ne jis shai se jilā paa.ī hai

ishq kī zinda-dilī husn kī ra.anā.ī hai

shāḳh-e-gul meñ jo nazākat jo lahak aa.ī hai

terī bāhoñ kī lachak hai terī añgḌā.ī hai

phir ubharne lage na ḳhasta-māzī ke nuqūsh

lauh-e-dil par koī tasvīr ubhar aa.ī hai

ġham-o-andoh ke is daur meñ kyā aish-o-nishāt

shādyāne haiñ ḳhushī ke na vo shahnā.ī hai

zindagī hai ki bulātī hai taqāzoñ kī taraf

dil giraftār-e-ḳham-e-zulf-e-chalīpā.ī hai

rahiye ḳhāmosh to hālāt bigaḌ jaate haiñ

aur kuchh kahiye to andesha-e-rusvā.ī hai

dil vo kyā hai ki na ho jis meñ mohabbat kā junūn

sar vo kyā hai ki jo be-vaz.a jabīñ-sā.ī hai

maiñ ki darpesh hai mujh ko safar-e-dūr-o-darāz

aur ik vo haiñ ki un ko ġham-e-tanhā.ī hai

koī marham na mudāvā koī phāhā na davā

ziist oḌhe hue zaḳhmoñ kī ridā aa.ī hai

zarf-o-himmat se sivā dī nahīñ jaatī taklīf

itnā ġham dete haiñ jitnī ki shakebā.ī hai

'tāj' ye zor-e-bayāñ jo bhī suḳhan meñ kuchh hai

asar-e-tarbiyat-e-shevan-e-mīnā.ī hai

mere afkar ne jis shai se jila pai hai

ishq ki zinda-dili husn ki ranai hai

shaKH-e-gul mein jo nazakat jo lahak aai hai

teri bahon ki lachak hai teri angDai hai

phir ubharne lage na KHasta-mazi ke nuqush

lauh-e-dil par koi taswir ubhar aai hai

gham-o-andoh ke is daur mein kya aish-o-nishat

shadyane hain KHushi ke na wo shahnai hai

zindagi hai ki bulati hai taqazon ki taraf

dil giraftar-e-KHam-e-zulf-e-chalipai hai

rahiye KHamosh to haalat bigaD jate hain

aur kuchh kahiye to andesha-e-ruswai hai

dil wo kya hai ki na ho jis mein mohabbat ka junun

sar wo kya hai ki jo be-waza jabin-sai hai

main ki darpesh hai mujh ko safar-e-dur-o-daraaz

aur ek wo hain ki un ko gham-e-tanhai hai

koi marham na mudawa koi phaha na dawa

zist oDhe hue zaKHmon ki rida aai hai

zarf-o-himmat se siwa di nahin jati taklif

itna gham dete hain jitni ki shakebai hai

'taj' ye zor-e-bayan jo bhi suKHan mein kuchh hai

asar-e-tarbiyat-e-shewan-e-minai hai