mere andar bhi mere yar si KHamoshi hai

mere andar bhī mire yaar sī ḳhāmoshī hai

ya.anī us paar bhī is paar sī ḳhāmoshī hai

dastakeñ detī huuñ nākām palaT aatī huuñ

ek dar hai jahāñ dīvār sī ḳhāmoshī hai

kis musavvir kā tarāshā huā shahkār hai tū

jo ḳhad-o-ḳhāl meñ kohsār sī ḳhāmoshī hai

saare ehsās masal degī kuchal jā.egī

us ke lab par jo girāñ-bār sī ḳhāmoshī hai

baat sun kar bhī mirī koī samajhtā hī nahīñ

shor kī sat.h pe tahdār sī ḳhāmoshī hai

kyoñ na is ko bhī kisī shakl meñ Dhālā jaa.e

ye jo atrāf meñ be-kār sī ḳhāmoshī hai

baaġh meñ jhūlā na sahrā meñ bagūla koī

samt-dar-samt pur-asrār sī ḳhāmoshī hai

chup kā matlab kabhī isbāt liyā jaatā thā

aaj isbāt meñ inkār sī ḳhāmoshī hai

mere andar bhi mere yar si KHamoshi hai

yani us par bhi is par si KHamoshi hai

dastaken deti hun nakaam palaT aati hun

ek dar hai jahan diwar si KHamoshi hai

kis musawwir ka tarasha hua shahkar hai tu

jo KHad-o-KHal mein kohsar si KHamoshi hai

sare ehsas masal degi kuchal jaegi

us ke lab par jo giran-bar si KHamoshi hai

baat sun kar bhi meri koi samajhta hi nahin

shor ki sath pe tahdar si KHamoshi hai

kyon na is ko bhi kisi shakl mein Dhaala jae

ye jo atraf mein be-kar si KHamoshi hai

bagh mein jhula na sahra mein bagula koi

samt-dar-samt pur-asrar si KHamoshi hai

chup ka matlab kabhi isbaat liya jata tha

aaj isbaat mein inkar si KHamoshi hai