mere dil ko is tarah lagta tumhaara bojh hai

mere dil ko is tarah lagtā tumhārā bojh hai

jis tarah be-nūr āñkhoñ ko nazāra bojh hai

ham ko kyā matlab hasīñ hogī to hogī umr ye

ham yatīmoñ ke liye bachpan hamārā bojh hai

donoñ kañdhe jhuk ga.e aThra baras kī umr meñ

mujh akelī jaan par saare kā saarā bojh hai

āsmānoñ par bhī raa.ij hai zamīñ jaisā nizām

dekh uupar āj-kal koī sitāra bojh hai

sar pe phirtī hai liye vo apne pahle ishq ko

kitnī pyārī laḌkī hai aur kitnā pyārā bojh hai

sar pe mere pahle se thiiñ ghar kī zimmedāriyāñ

aur ab ye ishq yaaro kitnā saarā bojh hai

mere dil ko is tarah lagta tumhaara bojh hai

jis tarah be-nur aankhon ko nazara bojh hai

hum ko kya matlab hasin hogi to hogi umr ye

hum yatimon ke liye bachpan hamara bojh hai

donon kandhe jhuk gae aThra baras ki umr mein

mujh akeli jaan par sare ka sara bojh hai

aasmanon par bhi raij hai zamin jaisa nizam

dekh upar aaj-kal koi sitara bojh hai

sar pe phirti hai liye wo apne pahle ishq ko

kitni pyari laDki hai aur kitna pyara bojh hai

sar pe mere pahle se thin ghar ki zimmedariyan

aur ab ye ishq yaro kitna sara bojh hai