mere ghar ke sare bartan ab purane ho gae

mere ghar ke saare bartan ab purāne ho ga.e

jo 'ibādat kī jagah thī ġhusl-ḳhāne ho ga.e

ghar muqaffal ho gayā hai ik na.ī tā'mīr ko

ghar meñ rahne vaale panchhī be-Thikāne ho ga.e

jis galī meñ pasliyāñ TuuTī thiiñ mere 'ishq kī

us galī se ab to guzre bhī zamāne ho ga.e

kar rahe the ābshāroñ kī baḌī tā'rīf sab

sāmne jo mai-kade aa.e Thikāne ho ga.e

shādiyāñ aisī bhī dekhīñ bachpane meñ bā-ḳhudā

jab gharoñ kī chādareñ hī shāmiyāne ho ga.e

jin gunahgāroñ ko dene log aa.e haiñ sazā

un ko to dariyā meñ Duube ik zamāne ho ga.e

kab tirī tīmārdārī se milī fursat mujhe

ghar bhī lagtā hai davā ke kār-ḳhāne ho ga.e

dasht kī ab be-ruḳhī se aa ga.e 'ājiz 'adīb'

peḌ būḌhe ho ga.e panchhī siyāne ho ga.e

mere ghar ke sare bartan ab purane ho gae

jo 'ibaadat ki jagah thi ghusl-KHane ho gae

ghar muqaffal ho gaya hai ek nai ta'mir ko

ghar mein rahne wale panchhi be-Thikane ho gae

jis gali mein pasliyan TuTi thin mere 'ishq ki

us gali se ab to guzre bhi zamane ho gae

kar rahe the aabshaaron ki baDi ta'rif sab

samne jo mai-kade aae Thikane ho gae

shadiyan aisi bhi dekhin bachpane mein ba-KHuda

jab gharon ki chadaren hi shamiyane ho gae

jin gunahgaron ko dene log aae hain saza

un ko to dariya mein Dube ek zamane ho gae

kab teri timardari se mili fursat mujhe

ghar bhi lagta hai dawa ke kar-KHane ho gae

dasht ki ab be-ruKHi se aa gae 'ajiz 'adib'

peD buDhe ho gae panchhi siyane ho gae