mere ghar mein rahta hai dar-ba-dar ka sannaTa

mere ghar meñ rahtā hai dar-ba-dar kā sannāTā

ik jagah simaT aayā shahr-bhar kā sannāTā

ḳhāmushī pe rotī haiñ mere ghar kī dīvāreñ

chīḳhtā hai is ġham meñ bām-o-dar kā sannāTā

'arse baa'd jab us ne ġhaur se mujhe dekhā

kah gayā thā sau bāteñ ik nazar kā sannāTā

bhiiḌ meñ bhī tanhā.ī pahle to na thī aisī

mujh meñ aaj dar aayā ye kidhar kā sannāTā

ik nishānī māñgī thī us se jiine kī ḳhātir

de gayā vo tohfe meñ 'umr-bhar kā sannāTā

jab bhī tanhā jaatī huuñ us taraf meñ 'farzāna'

aaj tak rulātā hai rah-guzar kā sannāTā

mere ghar mein rahta hai dar-ba-dar ka sannaTa

ek jagah simaT aaya shahr-bhar ka sannaTa

KHamushi pe roti hain mere ghar ki diwaren

chiKHta hai is gham mein baam-o-dar ka sannaTa

'arse ba'd jab us ne ghaur se mujhe dekha

kah gaya tha sau baaten ek nazar ka sannaTa

bhiD mein bhi tanhai pahle to na thi aisi

mujh mein aaj dar aaya ye kidhar ka sannaTa

ek nishani mangi thi us se jine ki KHatir

de gaya wo tohfe mein 'umr-bhar ka sannaTa

jab bhi tanha jati hun us taraf mein 'farzana'

aaj tak rulata hai rah-guzar ka sannaTa