میرے گھر میں رہتا ہے دربدر کا سناٹا

میرے گھر میں رہتا ہے دربدر کا سناٹا

اک جگہ سمٹ آیا شہر بھر کا سناٹا

خامشی پہ روتی ہیں میرے گھر کی دیواریں

چیختا ہے اس غم میں بام و در کا سناٹا

عرصے بعد جب اس نے غور سے مجھے دیکھا

کہہ گیا تھا سو باتیں اک نظر کا سناٹا

بھیڑ میں بھی تنہائی پہلے تو نہ تھی ایسی

مجھ میں آج در آیا یہ کدھر کا سناٹا

اک نشانی مانگی تھی اس سے جینے کی خاطر

دے گیا وہ تحفے میں عمر بھر کا سناٹا

جب بھی تنہا جاتی ہوں اس طرف میں فرزانہؔ

آج تک رلاتا ہے رہگزر کا سناٹا