mere haalat se munh moD ke jaane wale

mere hālāt se muñh moḌ ke jaane vaale

tujh se kuchh pūchh rahe haiñ ye zamāne vaale

dekh kar tujh ko vo ab raah badal lete haiñ

merī āvāz se āvāz milāne vaale

tū bhī aa jā.egā hālāt kī zad meñ ik din

merī barbādī ke afsāne sunāne vaale

jānib-e-shahr-e-vafā soch samajh kar jaanā

lauT ke aate nahīñ haiñ vahāñ jaane vaale

dil ke is TūTte rishte kā bharam rah jaa.e

ik nazar dekh le ai ruuTh ke jaane vaale

aa kabhī dekh mirā hāl-e-judā.ī aa kar

ġhair kī bazm meñ ai hañsne hañsāne vaale

vaqt se sīkhā hai maiñ ne ye hunar jiine kā

ḳhud hī gir jaate haiñ auroñ ko girāne vaale

'mehrbāñ' dil kā hai nāzuk ye zarā yaad rahe

ai mire dil pe na.e zaḳhm lagāne vaale

mere haalat se munh moD ke jaane wale

tujh se kuchh puchh rahe hain ye zamane wale

dekh kar tujh ko wo ab rah badal lete hain

meri aawaz se aawaz milane wale

tu bhi aa jaega haalat ki zad mein ek din

meri barbaadi ke afsane sunane wale

jaanib-e-shahr-e-wafa soch samajh kar jaana

lauT ke aate nahin hain wahan jaane wale

dil ke is TuTte rishte ka bharam rah jae

ek nazar dekh le ai ruTh ke jaane wale

aa kabhi dekh mera haal-e-judai aa kar

ghair ki bazm mein ai hansne hansane wale

waqt se sikha hai main ne ye hunar jine ka

KHud hi gir jate hain auron ko girane wale

'mehrban' dil ka hai nazuk ye zara yaad rahe

ai mere dil pe nae zaKHm lagane wale