mere hathon mein kuchh gulab to hain

mere hāthoñ meñ kuchh gulāb to haiñ

jo na mumkin rahe vo ḳhvāb to haiñ

rang bikhre haiñ chār-sū mere

reg-zāroñ meñ kuchh sarāb to haiñ

terī chāhat kī aarzū na sahī

ham tire sāya-e-itāb to haiñ

lafz Dhalne lage haiñ ma.anī meñ

zindagī se mile javāb to haiñ

raushnī sī rahī daraḳhtoñ par

jangaloñ par rahe shabāb to haiñ

raat ke manzar-e-ḳhamoshī meñ

chhiḌ ga.e naġhma-e-rabāb to haiñ

is zamāne kī kyā haqīqat hai

sāhil-e-vaqt par habāb to haiñ

mere hathon mein kuchh gulab to hain

jo na mumkin rahe wo KHwab to hain

rang bikhre hain chaar-su mere

reg-zaron mein kuchh sarab to hain

teri chahat ki aarzu na sahi

hum tere saya-e-itab to hain

lafz Dhalne lage hain mani mein

zindagi se mile jawab to hain

raushni si rahi daraKHton par

jangalon par rahe shabab to hain

raat ke manzar-e-KHamoshi mein

chhiD gae naghma-e-rabab to hain

is zamane ki kya haqiqat hai

sahil-e-waqt par habab to hain