mere hamrah sitare kabhi jugnu nikle

mere hamrāh sitāre kabhī jugnū nikle

justujū meñ tirī har raat muhim-jū nikle

terī rotī huī āñkheñ haiñ mirī āñkhoñ meñ

varna patthar meñ kahāñ jaan ki aañsū nikle

saañs lene kī jasārat bhī na kar pā.ūñgā

jism se mere jo pal bhar ke liye tū nikle

ahl-e-dil yūñhī tar-o-tāza nahīñ rakhte unheñ

zaḳhm bhar jaa.eñ to mumkin nahīñ ḳhushbū nikle

zikr meñ tere gavārā nahīñ itnā bhī mujhe

mā-sivā tere koī aur bhī pahlū nikle

terī chaukhaT pe pahuñchnā hai salāmat mujh ko

jaan pyāse kī jo nikle to lab-e-jū nikle

maiñ vo nādān ki DhūñDūñ koī apne jaisā

aur ahbāb the 'āzim' ki arastū nikle

mere hamrah sitare kabhi jugnu nikle

justuju mein teri har raat muhim-ju nikle

teri roti hui aankhen hain meri aankhon mein

warna patthar mein kahan jaan ki aansu nikle

sans lene ki jasarat bhi na kar paunga

jism se mere jo pal bhar ke liye tu nikle

ahl-e-dil yunhi tar-o-taza nahin rakhte unhen

zaKHm bhar jaen to mumkin nahin KHushbu nikle

zikr mein tere gawara nahin itna bhi mujhe

ma-siwa tere koi aur bhi pahlu nikle

teri chaukhaT pe pahunchna hai salamat mujh ko

jaan pyase ki jo nikle to lab-e-ju nikle

main wo nadan ki DhunDun koi apne jaisa

aur ahbab the 'azim' ki arastu nikle