mere haq mein nahin haalat nahin manti main

mere haq meñ nahīñ hālāt nahīñ māntī maiñ

gardish-e-vaqt tirī baat nahīñ māntī maiñ

ek payāde kī ye auqāt nahīñ māntī maiñ

bādshāhoñ ko bhī de maat nahīñ māntī maiñ

zindagī jaise guzartī hai vo dil jāntā hai

zindagī ko tirī sauġhāt nahīñ māntī maiñ

saath denā hai to phir haath bhī denā hogā

do kināroñ kī tarah saat nahīñ māntī maiñ

ye to jugnū kī chamak se bhī saham jaatī hai

sar-kashīda hai bahut raat nahīñ māntī maiñ

rang aur nasl se dil kā nahīñ rishta koī

ishq kī bhī ho koī zaat nahīñ māntī maiñ

jis se āñgan meñ mire phuul nahīñ khil sakte

aisī barsāt ko barsāt nahīñ māntī maiñ

haath milte haiñ magar dil nahīñ milte 'shabnam'

aise milne ko mulāqāt nahīñ māntī maiñ

mere haq mein nahin haalat nahin manti main

gardish-e-waqt teri baat nahin manti main

ek payaade ki ye auqat nahin manti main

baadshahon ko bhi de mat nahin manti main

zindagi jaise guzarti hai wo dil jaanta hai

zindagi ko teri saughat nahin manti main

sath dena hai to phir hath bhi dena hoga

do kinaron ki tarah sat nahin manti main

ye to jugnu ki chamak se bhi saham jati hai

sar-kashida hai bahut raat nahin manti main

rang aur nasl se dil ka nahin rishta koi

ishq ki bhi ho koi zat nahin manti main

jis se aangan mein mere phul nahin khil sakte

aisi barsat ko barsat nahin manti main

hath milte hain magar dil nahin milte 'shabnam'

aise milne ko mulaqat nahin manti main