mere harif hi ko sahi chahta to hai

mere harīf hī ko sahī chāhtā to hai

ab us kī zindagī meñ koī tīsrā to hai

maanā guzārtā hai vo masrūf zindagī

lekin kabhī kabhī hī mujhe sochtā to hai

chhalkī huī haiñ sā.at-e-jāñ kī gulābiyāñ

mahfil meñ āñsuoñ kī abhī rat-jagā to hai

us ko udaas dekh ke kitnī ḳhushī huī

merī tamām umr kā ġham-āshnā to hai

nok-e-mizha pe us kī sitāra kabhī kabhī

mere dhaḌakte dil kī tarah kāñptā to hai

sach hai ki titliyoñ se use hai munāsibat

kam kam hī barg-e-dil pe magar baiThtā to hai

añgḌā.iyoñ se phuul kī aatī to hai sadā

ḳhushbū kā shoḳh-o-shañg badan TūTtā to hai

mere harif hi ko sahi chahta to hai

ab us ki zindagi mein koi tisra to hai

mana guzarta hai wo masruf zindagi

lekin kabhi kabhi hi mujhe sochta to hai

chhalki hui hain saat-e-jaan ki gulabiyan

mahfil mein aansuon ki abhi rat-jaga to hai

us ko udas dekh ke kitni KHushi hui

meri tamam umr ka gham-ashna to hai

nok-e-mizha pe us ki sitara kabhi kabhi

mere dhaDakte dil ki tarah kanpta to hai

sach hai ki titliyon se use hai munasibat

kam kam hi barg-e-dil pe magar baiThta to hai

angDaiyon se phul ki aati to hai sada

KHushbu ka shoKH-o-shang badan TuTta to hai