mere hisse mein azal se koi ghar tha hi nahin

mere hisse meñ azal se koī ghar thā hī nahīñ

mujh se pahle koī āshufta-safar thā hī nahīñ

maiñ tirī yaad ke saa.e meñ basar kartā rahā

is ḳharābe meñ koī aur shajar thā hī nahīñ

koī dam koī ghaḌī ro diyā karte the miyāñ

terī furqat meñ qarīne kā hunar thā hī nahīñ

ek darvāza jahāñ nuur bichhā rahtā thā

ek āñgan ki jahāñ koī bashar thā hī nahīñ

ek tasvīr-e-tasavvur kī farāvānī thī

ik taḳhayyul ki zamāne se idhar thā hī nahīñ

is qadar dard ki bhartā hī na thā aah ye dil

is qadar ḳhauf ki phir koī bhī Dar thā hī nahīñ

mere hisse mein azal se koi ghar tha hi nahin

mujh se pahle koi aashufta-safar tha hi nahin

main teri yaad ke sae mein basar karta raha

is KHarabe mein koi aur shajar tha hi nahin

koi dam koi ghaDi ro diya karte the miyan

teri furqat mein qarine ka hunar tha hi nahin

ek darwaza jahan nur bichha rahta tha

ek aangan ki jahan koi bashar tha hi nahin

ek taswir-e-tasawwur ki farawani thi

ek taKHayyul ki zamane se idhar tha hi nahin

is qadar dard ki bharta hi na tha aah ye dil

is qadar KHauf ki phir koi bhi Dar tha hi nahin